Nikihe gisubizo cyafatwa ku gakiriro ka Gisozi kongeye gushya ubugira karindwi?

Mu gitondo cyo ku wa 30 Gicurasi 2025, inkongi y’umuriro yongeye kwibasira agakiriro ka Gisozi gaherereye mu murenge wa Gisozi, Akarere ka Gasabo, bituma abantu benshi bahakorera bongeye kwisanga mu gihirahiro.

Ni inkongi ya karindwi igaragaye muri aka gace kazwiho gukorerwamo imirimo y’ububaji n’ubukanishi.

Abaturage bari hafi y’aka gace bavuga ko umuriro watangiye kwibasira igice cy’akagari kazwiho ububaji ahagana saa kumi n’igice za mu gitondo. Icyo gice cyari kirimo imbaho, matela, n’ibikoresho bifatanya imbaho, bikaba byarakajije umuriro ukwira vuba.

Abashinzwe kuzimya inkongi baje ku rugero rutari rusanzwe, birimo n’imodoka ya serivisi z’ikibuga cy’indege cya Kigali, kugira ngo bafashe mu kuzimya. Ku bw’amahirwe, nta muntu wahaburiye ubuzima cyangwa ngo akomereke, kuko inzego z’umutekano zahageze hakiri kare zikabuza abaturage kwegera.

Nshimiyimana Alexandre, umwe mu bakoreraga muri aka gakiriro, yavuze ko yabuze ibintu bifite agaciro kagereranywa na miliyoni 18 z’Amafaranga y’u Rwanda. Ati: “Ibyanjye byose byahiye, nta nakimwe cyarokotse. Ubu ni ibyuma gusa usigaramo.”

Kimwe n’abandi benshi bakorera muri aka gace, Nshimiyimana nta bwishingizi yari afite, nubwo ngo yari mu nzira yo kubushaka. Yagize ati: “Ubushize nagerageje kujya kubushaka nsanga ibisabwa birenze ubushobozi bwanjye.”

Umujyi wa Kigali, binyuze ku muvugizi wawo Ntirenganya Emma Claudine, watangaje ko icyateye iyi nkongi kitaramenyekana ndetse n’agaciro nyako k’ibyangiritse kakiri mu bushakashatsi. Yavuze ko bazakomeza gukorana n’ubuyobozi bwa koperative ADARWA kugira ngo hatangwe amakuru akeneye mu kwishyurwa n’ubwishingizi.

Yagize ati: “Koperative yari ifite ubwishingizi ku bikorwaremezo byayo. Turakomeza gukorana na bo kugira ngo dosiye zikenewe zibe zuzuye, bakomeze gufashwa.”

Iyi nkongi ni iya karindwi ibaye muri aka gakiriro, ikaba ari inshuro ya kane mu gihe kitarenze imyaka ine. Inshuro zayibanjirije ni izabaye ku wa 28 Mata 2017, 29 Kamena 2019, 13 Ugushyingo 2020, 17 Kanama 2021, 12 Gashyantare 2023, na 23 Gicurasi 2023.

Abakoresha aka gakiriro basaba ubuyobozi gushyiraho ingamba zihamye zirimo gucunga umutekano w’ibikorwa byabo, gushyira imiyoboro y’amazi yihariye yo kuzimya inkongi, no guteza imbere gahunda y’ubwishingizi buhendutse kugira ngo bizamure ubushobozi bw’abakora imirimo y’ubukorikori n’ububaji.