Musanze yigaranzuye andi makipe mu mikino ya nyuma ya “Umurenge Kagame Cup 2025”
Akarere ka Musanze kabaye indiri y’ibyishimo nyuma y’uko amakipe yahagarariye aka karere yegukanye ibikombe mu mikino ya nyuma ya “Umurenge Kagame Cup 2025,” irushanwa ryitiriwe Perezida wa Repubulika, rikaba ryarasojwe kuri iki Cyumweru.
Mu mukino wa Basketball, Musanze yitwaye neza mu byiciro byombi. Ikipe y’abakobwa yatsinze iya Kamonyi ku manota 53 kuri 48, mu gihe ikipe y’abagabo nayo yigaranzuye Rutsiro iyitsinda 78 kuri 71. Zombi zegukanye ibikombe by’uyu mwaka.
Mbere y’uyu mukino wa nyuma, ikipe y’abakobwa ya Musanze yari yatsinze Nyamagabe ku manota 46-34, naho iy’abagabo itsinda Kayonza 75-56 mu mikino ya 1/2.
Imikino y’indi nayo yasojwe
Umupira w’amaguru:
Mu bagore, igikombe cyatwawe n’ikipe y’Umurenge wa Mahembe (Nyamasheke), nyuma yo gutsinda Umurenge wa Kacyiru (Gasabo) igitego kimwe ku busa. Igitego rukumbi cyabonetse ku munota wa 89, cyinjizwa na Ntagisanimana Saida.
Mu cyiciro cy’abagabo, ikipe ya Jabana (Gasabo) yigaragaje itsinda Mbazi yo mu karere ka Huye ibitego 2-0, ihita itwara igikombe.
Volleyball:
Akarere ka Kicukiro kasoje irushanwa n’ibyishimo mu bagabo, nyuma yo gutsinda Ngoma amaseti 3 kuri 1. Mu bagore, Gicumbi yatsinze Ngoma amaseti 3-2, umukino ukaba warageze ku seti ya nyuma ya “Seoul” kugira ngo hamenyekane utsinze.
Gusiganwa ku magare:
Mfiteyezu Emmanuel wo mu Karere ka Gicumbi yigaruriye isiganwa ry’uyu mwaka, aba uwa mbere ku nshuro ya gatatu yikurikiranya (2023, 2024, 2025). Mu bagore, Mukarugwiza Marie Solange wo mu Karere ka Kamonyi ni we wabaye uwa mbere.
Urutonde rw’abahize abandi mu mukino w’amagare:
Abagore:
1. Mukarugwiza Marie Solange (Kamonyi)
2. Mutuyimana Francine (Musanze)
3. Mukabikorimana Leatitia (Kirehe)
4. Tuyishimire Sandrine (Bugesera)
5. Nyiramahirwe Alliance (Nyabihu)
Abagabo:
1. Mfiteyezu Emmanuel (Gicumbi)
2. Ntacogora Emmanuel (Musanze)
3. Mugisha Gad (Gicumbi)
4. Imananiyonkuru Jacques (Nyabihu)
5. Habamahirwe Jean de Dieu (Gisagara)
Igisoro:
Masengesho Jean Claude wo mu Karere ka Kamonyi ni we watsinze mu bagabo, aho yatsinze Niyonagize Alfred wa Nyarugenge. Mu cyiciro cy’abagore, Mukundirehe Diane wo mu Murenge wa Munini (Nyaruguru) ni we wegukanye igikombe.
