Mu ntara ya Ngozi, hari abanyeshuri bashimuswe na Leta iyobowe na CNDD-FDD, baburiwe irengero.
Mu ntara ya Ngozi, hari abanyeshuri bamaze imyaka myinshi bashimuswe na Leta iyobowe na CNDD-FDD, baburiwe irengero.
Umwe muri abo banyeshuri ni uwitwa Irakoze Emery, umuryango we ukaba ukeneye kumenya ukuri ku ishimutwa yakorewe muri 2017 i Ngozi.
Imyaka umunani irashize umuryango wa Irakoze Emery utazi iyo umwana wabo yarengeye. Emery, umunyeshuri wigaga muri Kaminuza y’i Ngozi, yaburiwe irengero mu mwaka wa 2017. Kugeza n’ubu, nta na kintu na kimwe kimwerekeye kiramenyekana. Ibyamubayeho bikaba bikomeje kuba amayobera.
Uyu muryango urasaba abanyeshuri biganye na Emery cyangwa uwo ariwe wese waba ufite amakuru ku byabaye ko yayatanga kugira bashobore kumenya ukuri.
Irakoze Emery ni nde?
Emery Irakoze yavutse 1988 muri komine Tangara, intara ya Ngozi. Yakuriye mu nkambi y’abavanywe mu byabo ya Musenyi, ari naho ababyeyi be n’abandi bagize umuryango we bakiba kugeza n’ubu.
Ababanye nawe bavuga ko nta bikorwa bya politike byamurangaga. Yari umuntu wicisha bugufi, aharanira kwiga no kwiteza imbere. Yari umunyeshuri wo mu mwaka wa nyuma mu mashuri ya kaminuza i Ngozi igihe yashimutwaga.
2017–2018, imyaka y’umwijima ku basore bo muri Musenyi/Tangara
Amakuru y’ibyegeranyo bikomoka ku mashyirahamwe yigenga nka Ndondeza yerekana ko muri iyo myaka, abasore benshi bavaga mu ma kambi y’impunzi ya Musenyi bashimuswe n’iperereza ry’Uburundi, nta n’umwe usigaye.
Muri iyo myaka, iperereza mu ntara ya Ngozi ryari riyobowe na Venant Miburo, yamenyekanye cyane mu bikorwa byo gushimuta abantu. Bikavugwa ko yakoranaga cyane na Colonel Alexis Ndayikengurukiye, azwi kw’izina rya Nkoroka, ari nawe wapangaga gahunda z’ibikorwa by’iperereza mu gihugu hagati.
Hejuru yabo bose, hari hari Colonel Emmanuel Ndayiziga (ubu Général de brigade) wari ukuriye iperereza mu gihugu hagati.
Général-Major Maurice Mbonimpa, chef de cabinet w’uyobora SNR.
Général-Major Etienne Ntakarutimana, ayobora iperereza ry’igihugu (SNR).
Ibi bikorwa by’ishimuta byibasiye cyane intara ya Ngozi, ikaza ikurikira umugi wa Bujumbura mu bwinshi bw’abantu baburirwa irengero.
Abandi bamenyekenye bashimuswe muri icyo gihe kimwe na Emery:
Clovis Ngabirano, yafatiwe mu Kamenge, 05/11/2017.
Marius Niyonzima, umwarimu yafatiwe i Ngozi, 31/07/2018.
Prosper Nduwayo, yacuruzaga muri butike, yafatiwe i Ngozi, 08/09/2018.
Caporal-chef Jean-Claude Habiyakare, yafatiwe i Ngozi, 17/09/2018, agiye gushakisha murumuna we Prosper.
Athanase Mfatururimi, umunyeshuri wa master muri UB, yafashwe 25/11/2018 i Bujumbura.
Majambere Jean Bosco na Nzohabonimana Jean-Claude, abaganga b’amatungo, bafashwe i Ngozi, 10/03/2016.
Nduwimana Frédéric, umunywanyi wa FNL/Rwasa, yafashwe 09/01/2018 muri Tangara.
Hari uwamenya ibyabaye kuri Emery?
Umuryango wa Irakoze Emery urasaba abiganye na we, cyangwa uwo wese waba afite amakuru y’ibyabaye ku mwana wabo, kubafasha kumenya ukuri kw’aho yaba yarafungiwe, cyangwa niba atakiriho bakaba bifuza kumenya aho yashyinguwe.
