Madamu Jeannette Kagame yashimiwe guteza imbere ubuzima bw’abakobwa
Madamu Jeannette Kagame yashimiye Ihuriro Mpuzamahanga ry’Abaganga b’Inzobere mu kwita ku buzima bw’Abagore (FIGO) kubera igihembo ryamugeneye ku ruhare rwe mu guteza imbere ubuzima bw’abakobwa, no gushyigikira imishinga yabo, ashimira abitanga ngo bigerweho.Ni igihembo cyatangiwe i Cape Town muri Afurika y’Epfo ku mugoroba wo ku wa 05 Ukwakira 2025, mu nama Mpuzamahanga ya 25 ya FIGO.
Ihuriro Mpuzamahanga ry’Abaganga b’Inzobere mu kwita ku buzima bw’Abagore (FIGO) ryagaragaje ko mu myaka irenga 20 binyuze mu mishinga itandukanye, Madamu Jeannette Kagame yagaragaje ubwitange bukomeye mu guteza imbere ubuzima n’uburenganzira bw’abagore n’abakobwa.Agashyira imbere uburezi n’ubumenyi bw’abana b’abakobwa binyuze mu mishinga y’Umuryango Imbuto Foundation.
Gushyigikira uburenganzira bungana hagati y’abahungu n’abakobwa mu mashuri, gushishikariza urubyiruko kuba umusemburo w’ibisubizo ku bibazo by’inda ziterwa abangavu, n’ibindi bibazo bibugarije ndetse n’ibindi bikorwa bye by’indashyikirwa mu guteza imbere ubuzima bw’abagore n’abakobwa, no kubafasha gukingirwa Cancer y’inkondo y’umura ndetse n’iyi bere ni ibikorwa Madamu Jeannette Kagame ashimirwa.
Nyuma yo kugenerwa igihembo cya ‘FIGO Distinguished Recognition Award in Women’s Health’, Madamu Jeannette Kagame, abinyujije kuri X, yanditse ko binyuze mu Muryango Imbuto Foundation n’abafatanyabikorwa bawo, babonye inyungu sosiyete ivana mu kubakira ubushobozi abakobwa n’abagore.Yanditse ati “Iki gihembo ngituye abagore, abakobwa n’urubyiruko twigiyeho byinshi mu rugendo rwacu.”
