Kendrick Lamar yeretse imbabazi nke abo baribahataniye ibihembo bya BET Awards 2025 (Amafoto)

Mu byiciro bikomeye yegukanye harimo igihembo cy’umuhanzi w’umwaka, Alubumu y’umwaka, umuraperi w’umwaka ndetse n’indirimbo ifite amashusho yahize izindi.

Indirimbo ye “Not Like Us” yasohotse umwaka ushize ikagaragaza isubiranamo rikomeye hagati ye na Drake wo muri Canada, yegukanye igihembo cy’indirimbo ifite amashusho meza (Best Video Song). Iyo ndirimbo yari igice cy’ugushyamirana gukomeye mu magambo hagati y’aba baraperi bombi.

Alubumu ye nshya yise DNX irimo indirimbo “Luther” yakoranye n’umuhanzikazi SZA, yahawe igihembo cy’alubumu y’umwaka, ikomeza kwereka isi ko umuziki wa Kendrick ugira uruhare rukomeye mu gutuma injyana ya Rap ikomeza kwaguka no gusohoka mu ntera.

Kendrick yanasangiye igihembo cy’umuyobozi mwiza mu gukora amashusho (Best Video Director) hamwe na Dave Free, usanzwe akorana na we mu gukora amashusho y’ibihangano bye binyuranye.

Indirimbo Luther yakoranye na SZA yongeye kugaruka mu bihembo, kuko yegukanye n’igihembo cy’indirimbo y’abahanzi benshi yakunzwe kurusha izindi (Best Collaboration).

Mu ijambo yagejeje ku bitabiriye ibi birori byayobowe n’umunyarwenya akaba n’umukinnyi wa filime Kevin Hart, Kendrick Lamar yagize ati: “Ibi bihembo buri gihe byari byaragizwe isoko ryo guteza imbere umuco n’ubuhanzi, kandi kuba nkomeje gushyirwa imbere biranyereka ko n’ubutumwa bwanjye bwumvikana.”

Ibi birori byigaragaje nk’ibyihariwe n’abahanzi ba Hip Hop, cyane cyane Rap. Future na Metro Boomin (bakunze kwita Young Metro cyangwa London Young Metro) nabo bigaruriye igihembo cy’itsinda ryitwaye neza mu mwaka.

Umuraperikazi Doechi, uzwi no mu myigaragambyo yamagana politike z’ubutegetsi bwa Amerika ku bijyanye n’imisoro n’itotezwa ry’abigaragambya, nawe yegukanye igihembo cy’umuraperikazi witwaye neza (Best Female Hip Hop Artist).

Kendrick Lamar ntiyari abaye inshuro ya mbere yegukana ibihembo bya BET Awards, kuko no mu mwaka ushize yari yaratahanye ibice 8 muri 11 ahataniyemo, bikomeza kumushimangira mu ruhando rw’abanyabigwi nka Mariah Carey, Jamie Foxx ndetse na Snoop Dogg wamufashije gutangira umwuga we.