Imodoka y’Umunyamakuru Bianca Yari Yaribwe Yabonetse mu Karere ka Kamonyi
Nyuma y’igihe gito bivuzwe ko Bianca, umunyamakuru ukorera SK FM na ISIBO TV, yibwe imodoka yo mu bwoko bwa Hyundai, amakuru mashya yamenyekanye ni uko iyo modoka yagaragaye mu gace ka Bishenyi, gaherereye mu Karere ka Kamonyi.
Mu kiganiro yagiranye n’igitangazamakuru IGIHE dukesha iyi nkuru, Bianca yasobanuye ko imodoka ye yabonetse ku wa Gatanu tariki ya 13 Kamena 2025, umunsi umwe gusa nyuma y’uko yari yatangajwe ko yibwe. Icyakora, ubwo yagaragaraga, imodoka yari yangiritse.
Yagize ati: “Yari igongeshijwe, bayijugunya ku ruhande rw’umuhanda [bordure], barakuramo batterie, banajyana urufunguzo.”
Bianca yakomeje avuga ko nubwo bishimishije kuba imodoka ye yongeye kuboneka, uwakekwaga kuba yarayitwaye, wari umukozi we, atarafatwa ngo akurikiranwe n’inzego zibishinzwe.
Uretse akazi akora ku maradiyo no kuri televiziyo, Bianca afite n’umuyoboro wa YouTube aho atambutsa ikiganiro cye bwite.
