Ibihugu bizakira CAN 2027 byashyize ingengo y’imari ku bikorwa by’imyiteguro
Ibihugu bya Kenya, Uganda na Tanzania byamaze gushyira ingengo y’imari mu bikorwa bijyanye n’imyiteguro y’Igikombe cya Afurika cya 2027 (AFCON 2027), rizaba ribaye ku nshuro ya mbere ribereye mu karere k’Afurika y’Iburasirazuba.
Ku ngengo y’imari y’umwaka wa 2025/2026, uzahita ukurikirwa n’uzaberamo iri rushanwa, ibi bihugu bitatu bitegura gukoresha amafaranga akomeye mu kubaka no kuvugurura ibikorwaremezo bya siporo bizakira imikino.
Kenya, imwe mu bihugu bizakira iri rushanwa, yateganyije amafaranga agera kuri 130.804.953$, azifashishwa mu kuvugurura ibibuga birimo Moi International Sports Centre Kasarani, Nyayo Stadium ndetse no gutunganya Police Sacco Grounds.
Uganda yo ifite umushinga wo kubaka Akii Bua Stadium ndetse no kurangiza imirimo ya Hoima National Stadium, ikaba yageneye ibi bikorwa ingengo y’imari ingana na 138.140.173$. Muri Uganda kandi hateganywa no kuvugurura Bukhungu Stadium na Kipchoge Keino Stadium.
Tanzania, kimwe mu bindi bihugu bifite umukoro wo kwakira igikombe, izashora 68.271.620$ mu bikorwa byo kuvugurura no kunoza ibikorwaremezo bya siporo birimo Benjamin Mkapa Stadium, New Amaan Complex, ndetse na Samia Suluhu Hassan Stadium.
Iyi myiteguro irimo gukorwa mu gihe hasigaye imyaka ibiri ngo irushanwa ribe, bikazaba ari ku nshuro ya mbere mu mateka Igikombe cya Afurika cyabereye mu karere k’Afurika y’Iburasirazuba guhera cyatangira mu 1957.
