Huye: Abahanzi batangije gahunda “Uruhare rw’umuhanzi mu iterambere ry’igihugu”.

Huye: Abahanzi batangije gahunda “Uruhare rw’umuhanzi mu iterambere ry’igihugu”.

 

Huye, tariki ya 25 Nyakanga 2025, abahanzi baturuka mu karere ka Huye batangije ku mugaragaro gahunda yitwa “Uruhare rw’umuhanzi mu iterambere ry’igihugu”, igamije kugaragaza no guteza imbere impano z’abahanzi, gukangurira urubyiruko kugira uruhare mu kubaka igihugu, no gusigasira umuco nyarwanda.

 

Ibirori byabereye ku kigo cy’urubyiruko Huye Youth Friendly Center, giherereye mu murenge wa Ngoma, akagari ka Butare, umudugudu wa Mamba, ahasanzwe hitwa Centre DUSHISHOZE. Byari ibirori byari bibereye ijisho kandi byuzuyemo imvamutima nyinshi ku bari bitabiriye.

 

Umuhango wo gutangiza ibikorwa wagaragayemo byinshi byashimishije abawitabiriye, birimo n’imurika-mideri ryakozwe mu ndirimbo “Nyampinga”, izwi cyane mu marushanwa ya Miss Rwanda. Byanakumbuje benshi ibihe byiza by’aya marushanwa amaze igihe ataba.

 

Si ibyo gusa, kuko hanatambutse mu ndirimbo “Gakoni k’abakobwa”, indirimbo ikunzwe na benshi kuva kera, aho abamurikamideri bayitambutsemo mu buryo bwuje ubuhanga n’ubwiza. Hakurikiyeho umuhanzi w’indirimbo za Hip Hop na Rap, ndetse n’ababyinnyi babigize umwuga basusurukije abitabiriye.

 

Nk’uko byatangajwe n’abateguye iki gikorwa, iyi gahunda izamara amezi atanu, ikazasozwa m’Ukuboza 2025, aho hateganyijwe kumurikwa ibihangano bitandukanye byaba iby’abanyarwanda ndetse n’abanyamahanga babishaka.

 

Abifuza kumurika ibihangano byabo barasabwa kwiyandikisha vuba, kuko igihe cyo kwiyandikisha kiri hafi kurangira.

 

Iki gikorwa cyashimiwe cyane n’abitabiriye, bavuga ko ari uburyo bwiza bwo guhuza impano, guhererekanya ubumenyi, no gushishikariza urubyiruko kwitabira ibikorwa bifitiye igihugu akamaro binyuze mu buhanzi.

 

Nyuma y’iki gikorwa habaye umwanya wo kungurana ibitekerezo, kuko bifasha abahanzi kwiyubaka no guteza imbere impano zabo mu buryo burambye.

 

Nyuma y’aho igikorwa cyo gutangiza gahunda “Uruhare rw’umuhanzi mu iterambere ry’igihugu” kirangiriye, habayeho umwanya wo kuganira n’abahanzi batandukanye bitabiriye ibirori. Muri uwo mwanya waganiriwemo ku ruhare rwabo mu guteza imbere ubuhanzi, hatanzwe inama z’ingirakamaro cyane cyane ku bafite aho bahurira n’imurika-mideri.

 

Abahanga imideri (fashion designers) bagiriwe inama yo kujya bashyira imbaraga mu guhanga imideli yihariye, itandukanye n’iyo abantu baba basanzwe bambara mu buzima bwa buri munsi. Bagiriwe inama yo gushyira imbere udushya two kwihangira ibishya by’umwimerere, bishobora gutuma ibihangano byabo birushaho gukundwa no gukomeza guteza imbere umwuga wabo ku rwego mpuzamahanga.

 

Izi nama zaranzwe no gushishikariza aba bahanzi kwegerana, bagahuza ubushobozi n’ibitekerezo kugira ngo babashe gukora ibikorwa bifatika, byagirira akamaro igihugu n’urubyiruko muri rusange.

 

Ibibazo abahanzi bajya bibaza, n’ubushakashatsi bwakozweho

Abahanzi nyarwanda, cyane cyane abakizamuka, bakunze kugira ibibazo bitandukanye bijyanye n’uko bakwiteza imbere, uko bakwimenyekanisha, n’uko bakwinjira mu isoko ryagutse ry’ubuhanzi. Bamwe muri bo bakunze kwibaza:

 

Ese impano yanjye izagira agaciro?

 

Nakora iki ngo ngeze ku rwego rwo hejuru?

 

Ni gute nashobora kubona ubufasha cyangwa abaterankunga?

 

Nakwagura gute ibikorwa byanjye mu buryo burambye?

 

Aba bahanzi baruhukijwe no kumva ko ibi bibazo atari ibyabo bonyine, ahubwo ari ibyugarije benshi. Abateguye igikorwa batangaje ko hari ubushakashatsi bwakozwe kugira ngo hamenyekane imbogamizi abahanzi bahura na zo n’inzira zafasha mu kuzikemura.

 

Ibyavuye muri ubwo bushakashatsi bikazaba intandaro y’ibiganiro bizakomeza gukorwa mu gihe cyose iyi gahunda izamara.

 

Bimwe mubyo abantu benshi bajya bibaza harimo icyo kuvuga ngo umuhanzi ni muntu ki? Hari kandi n’abajya bibaza ku mpano icyo aricyo. Kuri ibyo bibazo byombi, ibisubizo buri wese ashobora kubitekerezaho mu buryo bwe, ariko nanone abantu bakagira aho bahuriza ku myumvire.

 

Ikibazo cya 1. umuhanzi ni muntu ki?

Umuhanzi ni umuntu ufite ubuhanga bwo gukora cyangwa kugaragaza ibihangano by’ubugeni cyangwa umuco mu buryo bwihariye, bushobora kuba burimo:

• Ubuhanzi bwo kuririmba cyangwa gucuranga (nk’abaririmbyi, abacuranzi)
• Ubuhanzi bwo gushushanya, kubumba, cyangwa kwubaka (nk’abashushanyi, abasani, abubatsi b’ibishushanyo)
• Ubuvanganzo (nk’abanditsi b’inkuru, imivugo, ibisigo, n’ibindi)
• Ubyina cyangwa ugaragaza ibihangano ku rubyiniro (nk’ababyinnyi, abakina ikinamico, abakinnyi ba filime)

Mu magambo arambuye, umuhanzi ni umuntu ukoresha impano n’ubushobozi bwe mu buryo bwo kugaragaza ibitekerezo, amarangamutima, cyangwa ubutumwa biciye mu buhanga bwa gihanga, bugamije kwigisha, gushimisha, cyangwa gutanga ubutumwa.

Hari n’abavuga ko buri wese ashobora kuba umuhanzi mu buryo bwe, bitewe n’uko yihangira ibintu bishya cyangwa uko agaragaza amarangamutima ye mu buryo butangaje.

 

Ikibazo cya 2. Ese impano iravukanwa, cyangwa irigwa?

Ni ikibazo gikomeye kandi gikunze kugibwaho impaka, ariko igisubizo kirimo impande zombi: impano ishobora kuvukanwa, ariko nanone irigwa, ikanatunganywa.

1. Impano ivukanwa (natural talent):

Hari abantu bavukana ubushobozi karemano bwo gukora ibintu runaka. Urugero:

• Umwana ushobora kuririmba neza atarigeze abihugurwamo.
• Umwana ushobora gushushanya neza ibintu bigaragara nk’ibitangaje ku myaka mito cyane.

Ibi bituma abantu bavuga ko impano ari impano, ko hari ibidashoboka kwigishwa ahubwo ari ibintu umuntu avukana.

2. Impano irigwa, ikanatunganywa (learned and developed talent):

N’ubwo umuntu yaba afite impano karemano, guhugurwa, imyitozo, n’ubushake bwo gukora cyane ni byo bituma impano ikura ikagera ku rwego rwo hejuru. Hari n’abantu batari bafite impano ihambaye bavukanye, ariko kubera imyitozo n’ubushake bwo kwiga, bagatera imbere kurusha abari bafite impano karemano ariko batayitayeho.

Urugero:

• Umuririmbyi wavukanye ijwi ryiza, ariko ataritoza neza ashobora kutagera ku rwego rwo hejuru.
• Undi watangiye afite ijwi risanzwe, ariko yize uko aririmba, akabikunda, agashaka ababimwigisha – ashobora kugera ku rwego rwo hejuru cyane.

Umwanzuro:

Impano nyayo ni iyo umuntu yavukanye ashobora gutunganya no guteza imbere binyuze mu myitozo n’ubumenyi.

Ariko n’iyo umuntu atayivukanye, yifitemo ubushake n’umurava, hari byinshi ashobora kwiga kandi akabigeraho.

 

 

Maman Des Filles: 0788627432.