Guverineri Bahati Musanga yagize Lumumba Kambere Muyisa Umuvugizi we Mukuru; Impinduka nshya muri politiki y’intara

Guverineri Bahati Musanga yagize Lumumba Kambere Muyisa Umuvugizi we Mukuru; Impinduka nshya muri politiki y’intara

Goma, 5 Kanama 2025, Guverineri mushya wa Kivu ya Ruguru, Bwana Bahati Musanga Joseph Erasto, yatangaje itegeko ryihariye ritangaza ishyirwaho rya Lumumba Kambere Muyisa nk’Umuvugizi Mukuru w’Ibiro bye. Uyu mugabo wigeze kumenyekana mu miryango irengera abaturage nka LUCHA no mu ishyaka rya Moïse Katumbi yahise arahizwa mu biro bikuru by’intara i Goma.

Iri tangazo rije mu gihe intara ya Kivu ya Ruguru ihanganye n’ibibazo by’umutekano muke, intambara y’ingabo za Leta (FARDC) na M23, ndetse n’isenyuka ry’ubuyobozi bwa gisivili muri bimwe mu bice biri mu ntambara.

Lumumba Kambere Muyisa: Uwahindutse umwanzi wa Leta nyuma yo gutavuga rumwe nayo

Uyu mugabo yigeze kumenyekana nk’umwe mu basore bakomeye muri LUCHA (Lutte pour le Changement), umutwe udaharanira inyungu wa politiki waharaniye uburenganzira bw’abaturage, ukamagana iterabwoba n’akarengane ka Leta ya Kabila. Nyuma yaje kwinjira muri politiki isanzwe abicishije mu ishyaka Ensemble pour la République rya Moïse Katumbi, aho yagiye agaragara nk’umuvugizi w’abaturage ba Rutshuru n’i Nyiragongo.

Kongera kumugarura mu buyobozi bwa M23 bishobora gutanga ubutumwa bushya: politiki nshya yo kunga no kwinjiza urubyiruko rufite igisobanuro mu miyoborere.

“Guhitamo Lumumba si impanuka. Ni ikimenyetso cy’uko turi kwinjira mu cyiciro gishya cy’imiyoborere ishingiye ku bumwe, kubaka amahoro ashingiye ku baturage no gukura politiki mu ntambara,” Bahati Musanga, Guverineri wa Kivu ya Ruguru.

Kuki uyu mwanya w’umurimo ushobora gutera impaka?

N’ubwo bamwe babibona nk’ikimenyetso cy’ubwiyunge, abandi baribaza niba Lumumba Kambere atazaba igikoresho cya politiki, cyangwa se niba atangiye kureka amahame yahozemo nk’umurwanashyaka w’ishyaka rya Moise Katumbi.

Ese azagira ijambo mu kubungabunga uburenganzira bw’abaturage?

Azashobora gusaba amahoro ahari intambara z’ingabo za Leta?

Azashobora gusaba ko imfungwa za LUCHA zirekurwa?

Iri hitamo muri rusange rihuriye he hagati ya M23 na Moise Katumbi n’ishyaka rye?

 

Iri tangazo rije mu gihe:

M23 igifite ibice bikomeye mu duce twa Rutshuru na Masisi;

 

Abaturage bavuga ko batakibona Leta mu bikorwa bibafitiye akamaro;

Hakenewe ijwi rihuriweho rigira uruhare mu biganiro cyangwa intambwe z’amahoro.

 

“Lumumba Kambere ashobora kuziba icyuho hagati ya Leta n’abaturage bo muri Kivu bagiye bacika intege. Aramutse atabaye igikoresho cya politiki, ahubwo agakomeza kurengera rubanda, yaba ikiraro cy’amahoro,” Michel Mbusa, impuguke mu mibanire y’ubutegetsi n’abaturage.

 

Ubutumwa bushya muri politiki y’intara

Bamwe mu basesenguzi bavuga ko Bahati Musanga ashaka kwitandukanya n’imiyoborere ya bamwe bamubanjirije, yabayeho yitandukanya n’imitwe yitwaje intwaro, akaba afata n’ingamba ndende zigamije amahoro.

 

Ibi bigaragazwa n’uko:

Itegeko rishyiraho Lumumba rije nyuma y’amezi abiri gusa Bahati Musanga arahiriye kuba umuyobozi muri Kivu ya Ruguru.

Amagambo ye ahamya ko “atari igihe cyo kurwana politiki y’amoko, ahubwo ko ari igihe cyo gukemura ikibazo cy’umutekano.”

Icyo bivuze ku rubyiruko n’abarwanashyaka b’impinduka

Iyo abahoze muri LUCHA batangiye guhabwa imyanya y’ubuyobozi aho M23 iyobora, birerekana ko M23 ishobora kuba yemera amajwi atavuga rumwe nayo. Ariko nanone, biratanga impuruza ku bandi barwanashyaka:

Bazabura abayobozi bashya basigaye inyuma?

Bazafatwa nk’abagambanyi?

Cyangwa bazabibona nk’intsinzi y’ubuvugizi butigeze busenyuka?

 

Politiki ya RDC iri mu bibazo, ariko inafite amahirwe yo kwivugurura

Niba Lumumba Kambere azakomeza gushyira imbere abaturage, gufasha urubyiruko no kwihagararaho mu gihe hari igitutu cya politiki, azaba intambwe nziza mu guhindura imyumvire ya “gouvernance ya gisirikare no gusiga rubanda”.

Aramutse akoze ibinyuranye n’ibyo yaharaniraga mu LUCHA, azaba yarabaye igikoresho.