Bamwe mu banyapolitiki n’abasirikare bakomeye ba RDC bashinjwa kugirana ibiganiro na AFC/M23
Hari amakuru yemeza ko bamwe mu banyapolitiki bakomeye ndetse n’abayobozi b’ingabo bo muri Repubulika Iharanira Demokarasi ya Congo (RDC) bamaze igihe mu biganiro n’abahagarariye ihuriro rya Alliance Fleuve Congo (AFC) ririmo umutwe wa M23, hagamijwe kuba baryinjiramo.
Ibi byagaragajwe na raporo y’impuguke z’Umuryango w’Abibumbye zikorera ku bibazo bya Congo, yasohotse mu kwezi kwa Gicurasi 2025, ishyikirizwa Akanama ka Loni gashinzwe umutekano. Iyo raporo yaturutse ku iperereza ryakozwe kugeza muri Mata 2025.
Bamwe mu bantu bivugwa ko bagiranye ibiganiro na Corneille Nangaa, uyobora AFC, harimo uwahoze ari Perezida wa RDC Joseph Kabila Kabange, Moïse Katumbi Chapwe utavuga rumwe n’ubutegetsi bwa Tshisekedi, ndetse na Jenerali John Numbi wahoze ari Umuyobozi wa Polisi n’Umugenzuzi Mukuru w’Ingabo.
Raporo ivuga ko imikoranire hagati y’AFC/M23 n’abandi banyapolitiki ndetse n’imitwe yitwaje intwaro iri kwiyongera cyane cyane mu Ntara za Kivu y’Amajyaruguru n’iy’Amajyepfo, aho bamwe mu barwanyi b’imitwe yahoze ari iya Wazalendo bivugwa ko bamaze kwifatanya n’umutwe wa M23.
Nubwo Kabila, Katumbi na Numbi bataratangaza ku mugaragaro kwinjira muri AFC/M23, iyo raporo ivuga ko bagiranye ibiganiro kenshi na Nangaa. Amakuru menshi avuga ko ibyo biganiro byabereye i Kampala muri Uganda ndetse no mu Mujyi wa Kigali.
Kabila ngo amaze igihe muri Goma, aho akunze kugirana ibiganiro n’ubuyobozi bwa AFC, ibintu benshi babifata nk’ikarita ikomeye muri politiki y’iki gihugu.
Kikaya Bin Kalubi, umwe mu bajyanama ba Kabila, aherutse gutangaza ko uyu wahoze ari Perezida w’iki gihugu, ahuje umugambi na AFC/M23 mu gushaka uburyo bwavaho ubutegetsi bwa Perezida Félix Tshisekedi bashinja gukoresha igitugu.
Ku ruhande rwa Katumbi, yagiye agaragaza kutumvikana n’ubutegetsi buriho, abushinja gukandamiza abatavuga rumwe na bwo, gufunga abantu binyuranyije n’amategeko ndetse no gucecekesha abanyamakuru. Aheruka gusubiramo ibi birego ubwo yagarukaga ku masezerano aherutse gusinywa hagati ya RDC n’u Rwanda agamije amahoro.
