Ambasaderi wa RDC mu Burundi n’abandi bakozi bakekwaho imikoranire n’imitwe yitwaje intwaro
Ambasaderi w’Igihugu cya Repubulika Iharanira Demokarasi ya Congo mu Burundi, Willy Mulumba, ari mu bantu bari gukorwaho iperereza bashinjwa gukorana n’amatsinda yitwaje intwaro arimo M23, MRDP-Twirwaneho n’ihuriro AFC.
Ku wa 27 Nyakanga 2025, inzego z’umutekano mu Burundi zataye muri yombi Laurent Ruboneka Musabwa, umwe mu bakozi ba Ambasade ya RDC i Bujumbura, unazwi nk’umwe mu bayoboye Abanyamulenge barokotse igitero cyabereye mu nkambi ya Gatumba mu 2004.
Bukeye bwaho, tariki 28 Nyakanga, undi mukozi wa ambasade, Félix Mweza, na we yafashwe. Uyu avuka mu bwoko bw’Abashi bo muri Kivu y’Amajyepfo. Bombi bahise boherezwa i Kinshasa n’indege Leta ya RDC yakodesheje, bajyanwa kubazwa n’inzego z’ubutasi bw’igihugu n’iz’ubutasi bwa gisirikare.
Ku wa 30 Nyakanga, Ambasaderi Mulumba we yahamagawe i Kinshasa kugira ngo atange ibisobanuro ku birebana n’abakozi be bari mu iperereza.
Bivugwa ko nyuma yo kubazwa, Mulumba yifuje gusubira mu Burundi agakomeza inshingano ze, ariko Leta ya Congo Kinshasa ikamusaba kuguma mu gihugu mu gihe iperereza rigikomeje.
Kugeza ubu, ntacyo ubuyobozi bwa RDC buratangaza ku mugaragaro ku kibazo cya Ambasaderi Mulumba, ariko amakuru aturuka imbere mu gihugu agaragaza ko nawe ashobora kuba akurikiranwaho imikoranire n’imitwe yitwaje intwaro ihungabanya umutekano mu burasirazuba bwa Congo.
