Abasirikare n’Abasivile 22 bakurikiranywe n’ubutabera bwa gisirikare
Igisirikare cy’u Rwanda, Rwanda Defence Force (RDF) cyatangaje ko Abasirikare n’Abasivile bakurikiranywe n’Ubushinjacyaha bwa Gisirikari kubera ibyaha bikomeye bijyanye no gukoresha umutungo wa Leta mu buryo bunyuranyije n’amategeko.
Kigali, 5 Kanama 2025,Ubuyobozi bwa RDF bwatangaje ko Ubushinjacyaha bwa gisirikari buri gukurikirana abasirikare babiri bafite ipeti rya ofisiye hamwe n’abandi basivile 20, bakurikiranyweho gukorana mu byaha bifitanye isano no kwaka no gutanga inyandiko zitemewe, ndetse no gukoresha umutungo wa Leta mu buryo butemewe n’amategeko.
Iri tangazo ryasohowe ku itariki ya 5 Kanama 2025, rivuga ko aba bose bafunzwe by’agateganyo mu gihe iperereza rikomeje ku byaha bikurikira:
1. Ubufatanyacyaha mu kwakira no gutanga inyandiko zitemewe.
2. Ubufatanyacyaha mu gukoresha umutungo wa Leta icyo utagenewe.
By’umwihariko, ibibazo biri gukurikiranwa bijyanye n’uko haguzwe amatike y’indege mu buryo bunyuranyije n’amategeko, hakoreshejwe uburyo butemewe kuri Konti ya Minisiteri y’Ingabo.
Ubuyobozi bwa RDF bwibukije ko uko amategeko abiteganya, abasivile iyo bafatanyije icyaha n’abasirikare baburanishwa n’inkiko za gisirikari.
Iri tangazo rije mu rwego rwo kugaragaza ko RDF ishyize imbere ubunyangamugayo, gucunga neza umutungo wa Leta, no kurwanya ruswa n’akarengane aho kava kakagera.
