Rwanda:Intwararumuri twaje kubabwira ko mutari mwenyine/Uwacu Julienne.

Yihanganishije ababyeyi agira ati: Intwararumuri twaje kubabwira ko mutari mwenyine. Abayobozi b’Igihugu cyacu babumva, babateze amatwi kandi babafite ku mutima. Twiyemeje kutazigera tubasiga inyuma, tuzakomeza gukora ibishoboka byose kugirango mubeho neza, mu cyubahiro no mu rukundo.

Ubudaheranwa ababyeyi bacu b’Intwaza batwereka ni isoko y’icyizere n’imbaraga bidufasha gukomeza kubaba hafi, kubitaho no kububaha. Urugo rwabo rurangwa n’ubumwe n’urukundo kandi rubanye neza n’abaturanyi, bagira uruhare mu gusigasira umurage w’urukundo n’ubumuntu.

Bagatoza abana bato babasura indangagaciro nziza bakanabasobanurira amateka akomeye Igihugu cyacu cyanyuzemo.

Ni Uko Umurage w’ubudaheranwa bawuhererekanya uva ku bakuru ujya ku bato.

Turashimira byimazeyo abafatanyabikorwa bose bagira uruhare mu gususurutsa urugo rw’Impinganzima no kwita ku buzima bw’ababyeyi.

Yanageneye ubutumwa bwihariye urubyiruko, agira ati:

“Rubyiruko, bana bacu, turabifuriza ubuzima bwiza, bushyize imbere ubumwe no gukunda Igihugu.

Murwanye amacakubiri n’ingengabitekerezo ya Jenoside. Kuba mufata umwanya mukaza kwifatanya n’ababyeyi bacu ni igikorwa cy’ubutwari.

Nimukomeze murangwe n’ubushishozi, mumenyekanishe amateka y’ukuri y’igihugu cyacu ku mbuga nkoranyambaga no mu buzima bwa buri munsi.

Murwanye ikibi, murwanye ivangura, mukomeze mube ishusho y’amahoro n’icyizere cy’ejo hazaza.