Perezida Samia Suluhu yatsinze amatora ya Perezida ku majwi hafi 98%
Komisiyo y’amatora muri Tanzania yatangaje ko Samia Suluhu Hassan, wari usanzwe ari Perezida, ari we watsinze amatora ya perezida yabaye ku wa gatatu, n’amajwi hafi 98%.
Komisiyo y’amatora itangaje ibi mu gihe hari ubwoba ko abantu babarirwa mu magana bapfiriye mu mvururu zabaye mu minsi yakurikiye amatora.
Akanama k’amatora katangaje ko Perezida Samia yatsindiye manda ya kabiri y’imyaka itanu ku butegetsi n’amajwi arenga 97%.
Ishyaka arimo rya Chama Cha Mapinduzi (CCM), rimaze imyaka hafi 50 ku butegetsi, ryari ryitezwe na benshi gutsinda amatora n’amajwi menshi cyane.
Abatavuga rumwe n’ubutegetsi bakomeye bajyaga guhatana na we bya nyabyo, umwe yarafunzwe aregwa ubugambanyi, ikirego ahakana, undi yangirwa kwiyamamaza ku mpamvu za tekinike zishingiye ku mategeko.
Amashyaka mato cyane 16, muri yose nta na rimwe rifite amateka yo gushyigikirwa cyane n’abaturage, ni yo yemerewe guhatana na CCM.
Aya matora yaranzwemo imyigaragambyo irimo urugomo mu bice bimwe bya Tanzania guhera ku wa gatatu.
Ishyaka rya mbere rikomeye ritavuga rumwe n’ubutegetsi rya CHADEMA, ryavuze abantu “bagera kuri 816 biciwe mu gukozanyaho n’abashinzwe umutekano. Umudipolomate ukorera muri Tanzania yabwiye itangazamakuru ko hari ibimenyetso byo kwizerwa byuko abantu nibura 816 bapfuye.
Perezida Samia, w’imyaka 65, yageze ku butegetsi mu mwaka wa 2021 nka Perezida wa Tanzania wa mbere w’umugore, nyuma y’urupfu rw’uwo yasimbuye Perezida John Magufuli, yari abereye Visi Perezida.
Mu ntangiriro, Samia yashimiwe kudohora ikandamiza ryo muri politike, ariko kuva icyo gihe urubuga rwa politike rwarafunganye. Ubutegetsi bwe bushinjwa kwibasira ababunenga bubinyujije mu kubata muri yombi no kubashimuta.
