AFC/M23 yahaye gasopo Radio Okapi ya Monusco kubwo kubangamira uburenganzira bwabo bwo gusubiza
Radio Okapi y’ubutumwa bw’umuryango w’Abibumbye bukorera muri Repubulika Iharanira Demokarasi ya Congo imaze iminsi ishinja ubutegetsi bw’ihuriro rirwanya ubutegetsi bwa Kinshasa ubwicanyi ,aho iyi Radio itangaza ko mu bice bigenzurwa niri huriro nta mutekano urangwamo bikaba byateye iri huriro kubyamagana.
Umuvugizi w’Ihuriro, Alliance Fleuve Congo, Laurence Kanyuka yavuze ko Radio Okapi itabaha umwanya ngo bavuge ku makuru itangaza, iyi radio ivuga ko mu bice bigenzurwa na M23 hakomeje kubera ubwicanyi.
Ni ubutumwa yanyujije ku rubuga rwa X rwahoze rwitwTwitter, Kanyuka yavuze ko Radio Okapi yica uburenganzira bwo gusubiza.
Ati “Turagaragaza akababaro kacu kubera uburyo Radio Okapi itangazamo amakuru areba Alliance Fleuve Congo (AFC/M23) mu kwica amahame yo kutabogama, ubunyamwuga bw’abanyamakuru, n’uburenganzira rusange.”
Inkuru Radio Okapi iheruka gutangaza ku mujyi wa Goma ugenzurwa na AFC/M23 ivuga ko Komine ya Goma na Karisimbi, zikomeje kuberamo ibikorwa by’ubwicanyi kuva tariki 03 – 25 Nyakanga, 2025.
Radio Okapi itangaza ibyavuzwe n’umuryango witwa Goma Hebdo Plus, uvuga ko abantu nibura 10 barashwe muri kiriya gihe, kandi ngo habaye ubujura mu ngo 65 bukorwa n’abantu bitwaje intwaro, muri bwo 26 bwabereye muri Goma naho ubundi 39 bwabereye muri Komine ya Karisimbi.
Iyi radio inavuga ko AFC/M23 yagiye ita muri yombi urubyiruko no gushyiraho imisoro y’umurengera. Ntabwo AFC/23 yahawe umwanya muri iyi nkuru.
Laurence Kanyuka umuvugizi wa AFC/M23 ashinja Radio Okapi gutangaza amakuru arimo icengezamatwara ryo kwanga AFC/M23, kandi yo ntihabwe uburenganzira bwo kugira icyo ivuga kuri ayo makuru.
Yagize ati “Radio Okapi nta kibazo igira mu guha ijambo umuntu cyangwa umuryango uvuga amagambo mabi ku muryango wacu (Ihuriro), ntabwo ishobora kugenzura ibyo bivugwa ngo ishake ukuri kwabyo.”
AFC/M23 ivuga ko uburyo Radio Okapi iyitangazo amakuru bubogamye, ndetse Kanyuka akavuga ko bagerageje gushaka uko bavugana n’abayobozi b’iyo radio ngo babahe umwanya biranga.
Yavuze ko AFC/M23 izafata ingamba zikwiye kugira ngo “ishyire iherezo ku icengezamatwara” ritangazwa mu buryo buharaho habayeho “kwica uburenganzira rusange”.
Umuvugizi wa AFC/M23 avuga ko mu bice igenzura iha uburenganzira itangazamakuru, rikora kinyamwuga, ritangaza amakuru impande zose zavuzeho kandi yizewe, ndetse buri wese agahabwa umwanya wo kuvuga ku bimuvugwaho.
AFC/M23 igenzura umujyi wa Goma na Bukavu kuva mu ntangiriro z’umwaka wa 2025ndetse iri huriro rikaba ryaratangaje ko rigenzura nibura ubutaka bungana na Kilometero kare ibihumbi 34 butuwe n’abaturage barenga miliyoni cumi n’imwe.
Ibice hafi ya byose bigenzurwa niri huriro bikunze kumvikanamo imirwano ituruka ku mitwe yitwaje intwaro ishyigikiwe n’ubutegetsi bwa Kinshasa,iyo mitwe imwe muriyo ikaba yigamba no gukora ubwicanyi rimwe na rimwe ikavuga ko abo yishe ari abarwanyi ba m23,mu gihe uyu mutwe wa m23 uhita usora amatangazo ugaragaza ko ari abasivile bishwe.
Iyi Radio Okapi itangaza ibi byuko ibice bigenzurwa niri huriro bikorerwamo ubwicanyi bwakozwe niri huriro ,mu gihe umutwe wa FDLR uri mu bice by’intara ya Rutshuru udahwema kugaba ibitero kubaturage baba sivire kandi abenshi muri aba baturage bakahasiga ubuzima.
M’uburasirazuba bwa Repubulika Iharanira demokarasi ya Congo hagiye gushira imyaka igera muri ine habera imirwano ihuza umutwe wa m23 waje kwibumbira mu ihuriro rya AFC/M23 Twirwaneho n’igisirikare cya RDC gifatanyije n’abacancuro,umutwe wa Wazalendo ,umutwe ugizwe n’abasize bakoze jenoside yakorewe Abatutsi mu Rwanda wa FDLR ndetse n’ingabo z’igihugu cy’u Burundi.
Umuryango w’abibumbye wita ku burenganzira bw’ikiremwamuntu uherutse gutangaza ko m’uburasirazuba bwa Repubulika iharanira Demokarasi ya Congo imitwe yitwaje intwaro ihakorera idahwema guhohotera abagore n’abana ndetse n’abandi banyantege nkeya.
