Nshuti Innocent agiye gupagarisa mu bihugu by’Abarabu

Rutahizamu Nshuti Innocent yerekeje mu ikipe ya ES Zarzis yo muri Tunisia avuye mu ikipe ya Sebail yo mu gihugu cya Azerbaijan.

Mu gitondo cyo kuri uyu wa Gatanu tariki 25 Nyakanga 2025 ni bwo amakuru yacicikanye ko rutahizamu Nshuti Innocent uvuka mu karere ka Musanze yasinyiye ikipe ya Espérance Sportive de Zarzis (ES Zarzis) yo muri Tunisia.

Mu ntangiriro z’umwaka wa 2015 ni bwo uyu mukinnyi yari yagiye muri Sebail yo muri Azerbaijan aho yayikiniye imikino 15 maze ayitsindira igitego kimwe muri shampiyona. Yerekeje muri Azerbaijan avuye muri Leta Zunze Ubumwe za Amerika mu ikipe ya One Knoxville.

Si ubwa mbere uyu mukinnyi agiye gukina muri shampiyona ya Tunisia kuko mu mwaka w’imikino wa 2018-2019 yakiniraga Stade Tunisien ariko imvune zituma atarambana nayo, ibintu byatumye asubira mu ikipe ya APR FC.