Burundi: Minisitiri w’intebe yahinduye imirimo
Minisitiri w’Intebe w’u Burundi,Gervais Ndirakobuca usanzwe kuri uyu mwanya kuva muri Nzeri 2022 yatsinze amatora ya Sena yabaye ku wa 23 Nyakanga 2025.
Ndirakobuca yagizwe umukandida w’ishyaka CNDD-FDD riri ku butegetsi, ahagararira intara ya Bujumbura nyuma yo gusezererwa muri Polisi tariki ya 9 Gicurasi, aho yari afite ipeti rya ‘Lieutenant Général’.
Imyanya 10 yose yahataniwe muri Sena yegukanywe n’abakandida b’ishyaka riri ku butegetsi, nk’uko byagenze mu matora y’abadepite yabaye muri Kamena.
Mu ntara ya Bujumbura, hatsinze Ndirakobuca na Léocadie Ndacayisaba, muri Buhumuza hatsinda Sabine Ntakirutimana na Cyriaque Nshimirimana, muri Burunga hatsinda Révérien Ndikuriyo usanzwe ari Umunyamabanga Mukuru wa CNDD-FDD, na Clotilde Kampimbare.
Muri Butanyerera hatsinze Josephine Nyiraneza na Berchmans Nzoyihaya, muri Gitega hatsinda Générose Ngendanganya na we wasezerewe muri Polisi y’u Burundi muri Gicurasi ubwo yari afite ipeti rya ‘Général Major’ na Ferdinand Ndayisavye.
