Gatabazi Jean Marie Vianney yongeye kigirirwa icyizere na Perezida Kagame
Perezida wa Repubulika y’u Rwanda, Paul Kagame, yayoboye Inama y’Abaminisitiri yemeje impinduka zitandukanye mu nzego za Leta, zirimo n’izijyanye no kongera imbaraga mu bigo bikomeye.
Muri izo mpinduka, Gatabazi Jean Marie Vianney yahawe inshingano nshya nk’umwe mu bagize Inama y’Ubutegetsi ya Komisiyo y’Igihugu ishinzwe gusubiza mu buzima busanzwe abahoze ari ingabo n’abarwanyi (Rwanda Demobilization and Reintegration Commission – RDRC).
Uyu mugabo umaze igihe kinini mu miyoborere y’igihugu, azwi cyane kubera imirimo inyuranye yakoze irimo kuba Minisitiri w’Ubutegetsi bw’Igihugu, Umudepite mu Nteko Ishinga Amategeko, ndetse na Guverineri w’Intara y’Amajyaruguru.
Inshingano nshya yahawe zizamusaba gukorana n’izindi nzego mu rwego rwo gufasha abasivili n’abahoze mu gisirikare gusubira mu buzima busanzwe binyuze mu mahugurwa n’ubuvugizi.
Muri iyo nama y’Abaminisitiri kandi hafashwe ibyemezo bitandukanye birimo no kugena abandi bayobozi bashya mu bigo bya Leta, barimo Major General (Rtd) Jacques Nziza wagizwe Umuyobozi Mukuru Wungirije wa RDRC, ndetse na Madamu Hortense Mudenge wagizwe Umuyobozi wa Kigali International Financial Centre (KIFC), asimbura Nick Barigye uherutse kugirwa Umuyobozi wa Crystal Ventures Ltd.
