Perezida Kagame yirukanye abakozi 219 ba RCS, anazamura abandi mu ntera
Perezida wa Repubulika y’u Rwanda, Paul Kagame, yafashe icyemezo cyo gusezerera abakozi 219 bo mu Rwego rw’Igihugu rushinzwe Igorora (RCS), barimo ACP Dr. George Ruterana wari ushinzwe ishami ry’ubuzima muri uru rwego.
Iri tangazo ryasohowe na RCS ku wa 11 Nyakanga 2025, ntiryatangaje impamvu z’aya masezerano y’akazi yahagaritswe, ariko uko byagiye bigaragara kenshi, abakozi basezererwa na Perezida baba bashinjwa amakosa akomeye.
Muri icyo cyemezo, Umukuru w’Igihugu yashyize mu kiruhuko cy’izabukuru bamwe mu bafatanyabikorwa bakuru muri RCS, barimo CP Jean Bosco Kabanda, ACP Camille Gatete, ACP Salim Munana Mugisha na ACP Emmanuel Nshoza Rutayisire.
Hari n’abandi bofisiye 10 bakuru n’abandi 14 bato basezerewe, hamwe n’abasuzofisiye n’abacungagereza 60. Abandi umunani basubijwe mu buzima busanzwe, naho babiri barasezererwa burundu.
Ku rundi ruhande, hari abakozi bazamuwe mu ntera. Harimo CSP Moses Ntawiheba, CSP John Dusa na CSP Micheal Kamugisha bahawe ipeti rya ACP. SSP Beatrice Uwamahoro, SSP Olivier Mukantabana, SSP Jean Pierre Olivier Bazambanza ndetse na SSP Emmanuel Hillary Sengabo wahoze ari Umuvugizi wa RCS, bahawe ipeti rya CSP.
Abandi 11 bari bafite ipeti rya SP bazamuwe ku rwego rwa SSP, ba CIP 3 bagirwa SP, ba AIP 10 bazamuwe ku rwego rwa IP, ba Sergeant 62 bahawe ipeti rya Senior Sergeant, ba Corporal 20 baba Sergeant, naho ba Warder 77 bahawe ipeti rya Corporal.
Ibi byose bigaragaza impinduka zikomeye muri RCS, aho bamwe basubizwa mu buzima busanzwe abandi bakazamurwa mu ntera, mu rwego rwo kunoza imikorere y’urwego.
