Perezida Museveni yavuze ku byo guha ubwenegihugu impunzi z’Abanyarwanda muri Uganda
Perezida wa Uganda, Yoweri Kaguta Museveni, yavuze ko impunzi z’Abanyarwanda zituye muri icyo gihugu zidashobora guhabwa ubwenegihugu bwa Uganda, kuko amategeko ahari ubu atabyemera. Ibi yabigarutseho ku wa 7 Nyakanga 2025, asubiza ibibazo ku bibazo bimaze igihe bivugwa bijyanye n’uburenganzira bw’abimukira bakomoka mu Rwanda.
Museveni yavuze ko ikibazo cy’aba Banyarwanda kimaze igihe kimuhangayikishije, by’umwihariko kubera ko kitari gukemurwa uko bikwiye. Yavuze ko amaze kugirana ibiganiro n’itsinda ry’Abanyarwanda batuye muri Uganda ku wa 23 Kamena 2025, mu Nama yabereye muri Perezidansi i Entebbe, yitabiriwe n’abayobozi barimo Minisitiri w’Umutekano n’abahagarariye inzego z’abinjira n’abasohoka.
Yagize ati: “Nari maze kurambirwa n’amakuru y’uko Abanyarwanda b’abimukira bafatwa nabi, ndetse n’ibirego biza buri gihe. Ibyo byatumaga nshidikanya niba hari abantu bafite imigambi mibi ari bo babitiza umurindi. Ariko nyuma y’iyo nama, nasobanukiwe imizi y’ikibazo.”
Yongeyeho ko icyemezo cy’ubwenegihugu kitagomba gufatwa n’inzego nk’iz’abinjira n’abasohoka cyangwa iz’indangamuntu ziri i Kampala, ahubwo ko amakuru y’ingenzi agomba gushingirwa ku nzego z’ibanze ziba zizi amateka y’abo baturage.
Museveni yanagaragaje ko nubwo hari abashobora kuba bagerageza kwiyitirira ubwenegihugu bwa Uganda, hari n’abandi bafite uburenganzira bwo kukibona, cyane cyane abaturutse mu miryango y’Abanyarwanda bimukiye muri Uganda mbere ya 1926. Gusa yavuze ko aba na bo batemerewe kugira ubwenegihugu bubiri. Ati: “Niba ushaka kuba Umunya-Uganda, ukeneye kureka ubundi bwenegihugu. Icyo tutakwemera ni ugufatanya ubwenegihugu bwa Uganda n’ubw’ibihugu duturanye cyangwa ibindi byo muri Afurika.”
Ku bijyanye n’impunzi z’Abanyarwanda zaje muri Uganda mu bihe byashize, Museveni yavuze ko nyinshi zatashye, ariko ko hari bake basigaye bagishaka ubwenegihugu. Ku bamusaba kubuhabwa, yavuze ko ibyo bizashoboka gusa ari uko amategeko avuguruwe.
Yagize ati: “Nimucunge amategeko. Tuzakomeza kubaha icyubahiro, ariko niba dukeneye guha umuntu ubwenegihugu, amategeko agomba kubanza kuvugururwa.”
Yasoje ashimangira ko komite y’akarere igizwe n’inzego z’ibanze ari yo izajya yemeza niba umuntu yujuje ibisabwa ngo yemererwe ibyangombwa by’igihugu, hashingiwe ku makuru atangwa n’abamuzi neza aho atuye.
