Kazungu Denis ushinjwa kwica abantu 13 yavuze amagambo agaragaza ko yifuza gufungurwa
Kazungu Denis, wahamijwe ibyaha bikomeye by’ubwicanyi n’ibindi byaha byibasiye ikiremwamuntu, yasabye Urukiko Rukuru rwa Kigali ko rwamugabanyiriza igihano cy’igifungo cya burundu yahawe. Mu rubanza rwabaye ku wa 12 Kamena 2025, Kazungu yavuze ko yemeye ibyo ashinjwa, abisabira imbabazi kandi afasha ubutabera mu iperereza, bityo ko akwiriye impuhwe.
Ubushinjacyaha bwanze kwakira ubujurire bwe, buvuga ko bwatanzwe nyuma y’igihe cyagenwe n’amategeko, kuko icyemezo cy’urubanza cyari cyamaze gutangwa ku ikoranabuhanga ku wa 9 Werurwe 2024, mu gihe ubujurire bwatanzwe ku wa 18 Kamena 2024. Gusa Me Murangwa Faustin, wunganira Kazungu, yavuze ko bagaragaje ubushake bwo kujurira ku wa 4 Mata 2024, bityo ko nta cyacitse.
Urukiko rwatangaje ko icyo kibazo cy’igihe cy’ubujurire kizafatwaho umwanzuro hamwe n’indi myanzuro y’urubanza.
Kazungu yongeye kwemera ibyaha byose aregwa, ariko yitandukanya n’iyicwa ry’umusore witwa Kimenyi Yves, avuga ko atigeze amugirira nabi. Ubushinjacyaha nabwo bwemeye ko urwo rupfu rutagaragara mu rubanza rwamuregaga, ariko buvuga ko naramuka habonetse ibimenyetso bushobora gutanga ikirego gishya.
Uyu mugabo yavuze ko yemeye ibyaha atabitewe n’agahato, kandi ko icyo ashaka ari amahirwe yo gusubira mu buzima busanzwe, agatanga umusanzu we mu kubaka igihugu. Mu magambo ye bwite, yagize ati:
“Nzi ko ibyo nakoze ari amahano, sinabikoze kubera ikindi, ariko nabuze icyerekezo. Ndashaka imbabazi z’Abanyarwanda, n’ingabire yo kongera kugira amahirwe yo kuba umwe muri bo.”
Yasabye imbabazi ku rwego rwo hejuru, yisabira imbabazi Umukuru w’Igihugu, Guverinoma, ndetse n’imiryango y’abazize ibikorwa bye. Yagize ati:
“Uwana umwana si ukumukubitisha inkoni, ahubwo ni ukumwereka urukundo n’uburere. Nifuza kwicuza no kwihana ibyo nakoze.”
Umwunganizi we yasabye ko yakwitabwaho nk’uwari atarigeze akurikiranywaho icyaha mbere, wemeye icyaha, kandi wagaragaje ukwicuza nyako.
Ubushinjacyaha bwo bwagaragaje ko ibikorwa bye bifite uburemere bukomeye, harimo ubwicanyi, iyicarubozo, no guhisha imibiri y’abazize ibyo yakoze. Bwavuze ko ibyo yakoze nta bushobozi buke bwari bubihishe inyuma, kuko yabikoraga azi neza ibyo akora, atari yasinze cyangwa ngo abe afite ibibazo byo mu mutwe.
Abari basabye indishyi, na bo bagaragaje ko igihano cya burundu kigomba kugumaho, bavuga ko Kazungu agaragaza ubukana, ubunyamaswa n’ubugome budasanzwe, ku buryo agarutse mu muryango nyarwanda yakongera guteza akaga.
Uko Kazungu yisobanura ku nkomoko y’ibyaha bye
Mu kwisobanura imbere y’urukiko, Kazungu yavuze ko mu 2009 yatangije ikigo cyita ku bana b’imfubyi mu Murenge wa Remera, ariko icyo gikorwa kirahagarara mu 2016 kubera kubura ibyangombwa n’amikoro. Yaje kujya muri Kenya ashaka imibereho, acuruza inzoga azijyana muri Uganda. Yavuze ko yahugiwe n’ubukene ubwo yamburwaga ibicuruzwa n’amafaranga agera ku bihumbi $120 ku mupaka.
Avuga ko yahereye ubwo atakaza icyizere, maze mu 2021 atangira kwiba inshuti ze. Mu 2022 ngo ni bwo yatangiye ibikorwa byo kwica abamugiraga amakenga cyangwa ashobora kumushinja, kugira ngo yikingire.
Ubushinjacyaha bwemeje ko ibikorwa bye byakozwe mu bushake, nta bitera bwoba cyangwa ibiyobyabwenge byabigizemo uruhare, ahubwo yabikoraga afite ubushishozi n’ubushobozi bwo kumenya ingaruka zabyo.
