Ronaldo yanditse amateka, Yamal ategereza ahazaza: Portugal yeretse Espagne icyo gukora(Amafoto)
Ikipe y’Igihugu ya Portugal yongeye kwandika amateka mu mupira w’amaguru nyuma yo kwegukana UEFA Nations League ya 2025, itsinze Espagne kuri penaliti 5-3, nyuma yo kunganya ibitego 2-2 mu minota 120.
Ni umukino wa nyuma wabereye mu gihugu cy’u Budage, ku wa 8 Kamena 2025, aho abafana bari bategereje kureba uko Cristiano Ronaldo, umukinnyi w’umunyabigwi, ashobora kongera guhagurutsa igikombe mu izina ry’igihugu cye, ndetse no gukurikirana uburyo urubyiruko nka Lamine Yamal ruhagaze muri ruhago yo ku rwego rwo hejuru.
Uko umukino wagenze
Portugal na Espagne batangiye banganya ingufu, umukino wihuta cyane ndetse ugaragaza ishyaka ridasanzwe ku mpande zombi. Ku munota wa 20, Espagne yafunguye amazamu ku gitego cya Martín Zubimendi, watsinze ku mupira wahinduwe na Lamine Yamal, nyuma y’uko ba myugariro ba Portugal batawukurikiranye neza.
Gusa ibyishimo bya Espagne ntibyatinze kuko ku munota wa 26, Nuno Mendes yatsinze igitego cyiza cyaje nyuma y’ishoti rikomeye ryamushimangiye nk’umwe mu bakinnyi b’ingenzi muri uwo mukino.
Mu gihe umukino wagendaga wiyongera ubushyuhe, Espagne yongeye kuyobora ku gitego cyatsinzwe na Mikel Oyarzabal ku munota wa 41, ubwo Pedri yamuhaga umupira mwiza mu buryo bwihuse avuye hagati mu kibuga.
Portugal, itishimiye kuva mu gice cya mbere iri inyuma, yagarutse mu gice cya kabiri ishaka igitego cyo kwishyura. Nubwo Bruno Fernandes yatsinze ku munota wa 48, igitego cye cyanzwe kubera ko umupira yawuhawe na Ruben Neves wari mu mwanya w’outside.
Bashize imbaraga mu busatirizi, maze Cristiano Ronaldo afasha igihugu cye kubona igitego cya kabiri ku munota wa 60, nyuma y’uko umupira wahinduwe na Nuno Mendes ukoreweho n’umukinnyi wa Espagne ugwa imbere ya Ronaldo.
Espagne na yo ntiyacitse intege, maze Isco agerageza gutera ishoti rikomeye ku munota wa 82, ariko umunyezamu Diogo Costa aritabara neza arushyira muri koruneri.
Amasaha y’inyongera na penaliti
Iminota 90 y’umukino yarangiye amakipe yombi anganya ibitego 2-2, bituma hongerwaho indi minota 30. Muri iyo minota, nta gitego cyabonetse, umukino ujya kuri penaliti.
Mu gikorwa cyo gutera penaliti, Portugal yitwaye neza idahusha n’imwe muri eshanu yateye. Espagne yo yahushije penaliti imwe yatewe na Álvaro Morata. Rúben Neves yatsinze penaliti ya nyuma ya Portugal, ishimangira intsinzi y’iki gihugu.
Gusubira mu mateka
Ni inshuro ya kabiri Portugal yegukanye UEFA Nations League, nyuma yo gutwara igikombe cy’iri rushanwa bwa mbere mu 2019. Iyi ntsinzi ikaba yongeye gushimangira ko Portugal ari igihugu gihagaze neza muri ruhago y’u Burayi, ndetse no mu rwego mpuzamahanga.
